Säʹmmlai tuõttvuõtt- da suåvâdvuõttkomissio vuässââtt tän eeʹjj Skábmagovat -alggmeerai jieʹllikarttfestivaaʹle Aanrest puõʹtti neäʹttel-looppâst 26.–28.1. Komissio lij mieʹldd riâššmen piâtnâc 27.1.Sâpmi II -čuäjtõõzz mâŋŋa tuõttvuõtt- da suåvâdvuõttproseeʹssid õhttneei paneeʹlsaǥstõõllmõõžž, koon väʹlddmainsteejen lij Donald (Del) Laverdure. Komissio piisarkåʹdd čuäjtââll tåimmamvueʹjjid Sajoozz jõnnkääʹrdest nelljdpeeiʹv ääʹveempooʹddest sueʹvet jeäʹǩǩääž räjja.
Laverdure tååimai veäʹǩǩsiisǩministeeʹren Õhttõõvvâmvääʹld presideʹntt Barack Obama halltõõzzâst da leäi vaaldâšm ââʹlmõs sââʹjest leʹddi alggmeer eeʹttǩeei. Laverdure lij mâŋŋa lookkâm terapeuʹttjen da tåimm še pueʹreejen Crow -meervuiʹm.
Skábmagovat -jieʹllikarttfestivaali vuõssjeäʹǩǩääst vueiʹnet aanrõš Ritva Torikka jieʹllikaaʹrtid, koin ”Out of Darkness into Light” ǩiõttʼtââll palddlõõžži alaskaniiʹǩǩi da säʹmmlai tuõttvuõtt- da suåvâdvuõttproseeʹssid. Sápmi I čuäjtõs riâžžât Siidast čiâss 15, koon õhttneei paneeʹlsaǥstõõllmõš Sajoozz parlameʹnttlõnnj Soljust čiâss 16.30 ääʹljeeʹl.
Paneeʹl väʹlddmainsteejen lij Donald (Del) Laverdure. Säʹmmlai tuõttvuõtt- da suåvâdvuõttkomissiost paneeʹlsaǥstõõllmõʹšše vuässâʹtte komissaar Irja Jefremoff da Heikki Paltto di väʹlddpiisar Ulla Aikio-Puoskari. Lââʹzzen saǥstõõllmõʹšše vuässââtt komissio valmštõõllpââʹjest kõskksânji mieʹldd leʹddi Tiina Sanila-Aikio da sääʹm psykososiaalʼlaž tuärj juâkkaz tuâjjlaž Lahja Eriksen
Paneeʹlsaǥstõõllmõš riâžžât õhttsažtuâjast Antti Pentikäisin. Son tååimai ääiʹjab Säʹmmlai tuõttvuõtt- da suåvâdvuõttkomissio jåʹttʼtummuž tuärjjan jiõččnaž vuäʹppõõzzuʹvddjen. Pentikäinen jååʹđat ååʹn Õhttõõvvâmvääʹldest tuõttvuõtt- da suåvâdvuõttproseeʹssi ooudâsviikkmõʹšše čiŋlmõõvvi kõõskõõzz.
Komissaar da komissio tuâjjla vuässâʹtte še jeeʹres jieʹllikarttčuäjtõõzzid. Komissiost lij pääiʹǩ âʹlnn Sajoozzâst kääzzkõspäiʹǩǩ, koʹst vuäǯǯ teâđ komissio tuâjain da puõʹtti tåimmʼmõõžžâst.
Pueʹtted tiõrvân saǥstõõllâd!
Lââʹssteâđ:
Ulla Aikio-Puoskari, +358 50 431 9952
Inari Alanko, +358 50 478 4450
Inari Alanko, +358 50 478 4450
Mervi Semenoff, +358 50 448 3217