Sámiid duohtavuohta- ja soabadankomiššuvdna oassálastá Skábmagovat –álgoálbmogiid filbmafestivalii Anáris boahtte vahkkoloahpa 26.-28.1. Komiššuvdna lea mielde ordnemin bearjadaga 27.1. Sápmi II čájáhusa maŋŋá duohtavuohta- ja soabadanproseassaide laktáseaddji panelaságastallama, man váldoságastallin lea crow-álbmogii gullevaš Donald (Del) Laverdure. Komiššuvnna čállingoddi lea ovdanbuktimen doaimmaideaset Sajos stuorra feaskáris duorastaga rahpandoaluid rájes gitta lávvardat eahkeda rádjái.
Laverdure barggai sisriikkalaš áššiid veahkkeministtarin USA presideanta Barack Obama hálddahusas ja lei hálddahusa alimus álgoálbmogiid ovddasteaddji. Laverdure lea dan maŋŋá skuvlen iežas terapeuhttan ja bargá buorideaddjin Crow -álbmogii.
Skábmagovat -filbmafestivála prográmmas leat anárlaš Ritva Torikka filmmat, main ”Out of Darkness into Light” gieđahallá Alaska ja sámiid duohtavuohta- ja soabadanproseassaid baldálága. Sápmi I čájáhus ordnejuvvo Siiddas bearjadaga dmu 15. Dasa laktáseaddji panelaságastallan álgá Sajosis parlameantasále Soljjus dmu 16.30.
Panela váldoságastallin lea Donald (Del) Laverdure. Sámiid duohtavuohta- ja soabadankomiššuvnnas panelaságastallamii oassálastiba komissárat Irja Jefremoff ja Heikki Paltto ja váldočálli Ulla Aikio-Puoskari. Dasa lassin ságastallamii oassálastiba Tiina Sanila Aikio, gii lei mielde komiššuvnna válmmaštallanbargguin, ja Lahja Eriksen, gii bargá sámiid psyko-sosiála ovttadat Uvjjas.
Panelaságastallan ordnejuvvo ovttas Antti Pentikäisiin, gii barggai sorjjasmeahttun ráđđeaddin dalle go sámiid duohtavuohta- ja soabadankomiššuvnna plánejedje. Pentikäinen jođiha dál USA:s guovddáža, mii ovddida duohtavuohta- ja soabadanproseassaid.
Komissárat ja komiššuvnna bargit oassálastet maid eará filbmačájáhusaide. Komiššuvnnas lea Sajosis ovdanbuktinsadji, gos juhkkojuvvojit dieđut komiššuvnna bargguin ja boahttevaš doaimmain. Buresboahtin ságastallat!
Lassedieđut:
Ulla Aikio-Puoskari, +358 50 431 9952
Inari Alanko, +358 50 478 4450
Aslak Uula Länsman, +358 50 479 2204
Mervi Semenoff, +358 50 448 3217