Kuullâmpoodd
Jueʹjj tobdlmääd
Tuõttvuõtt- da suåvâdvuõttkomissio ǩiččlõõttmõššân lij lââʹzzted tieʹttemvuõđ säʹmmlain Lääʹdd alggmeeran da raaveed säʹmmlai vuõiggâdvuõđi teâuddjummuž Lääʹddjânnmest.
Komissio reäšš tuâjas čõõđ viikkmõššân kuullmõõžžid, koin noorât oʹdinakai säʹmmlai da õhttsažkooʹddi tobdlmid jieʹllmest säʹmmliʹžžen Lääʹddjânnmest. Kuullmõõžžin kaartʼtet Lääʹdd riikk da jeeʹres veʹrǧǧniiʹǩǩi tååimai vaaiktõõzzid säʹmmlaid.
Vuäitak mainsted jiijjad leʹbe tuu toobdâs oummu tobdlmid historiallâž leʹbe ânnʼjõž čårstummšset, riikk leʹbe riikk veʹrǧǧniiʹǩǩi tååimain. Komissio jorddmõš lij ärvvtõõllâd tuâlʼjõž da ânnʼjõž čårstummuž di riikk suddeempolitiikk da vuõiggâdvuõđi neuʹrrummšid riikk da jeeʹres veʹrǧǧniiʹǩǩi tåimmjummšest.
Vuäitak suåppâd kuullmõõžž ääiʹjpooddâst da kuullâmnääʹlest vääʹldeeʹl õhttvuõđ komissio piisarkådda addrõõzzâst info@sdtsk.fi leʹbe soiʹttjeeʹl ǩeäzz-ne piisarkååʹdd vuäzzliʹžže (õhttvuõđteâđ vueʹlnn leʹbe õhttvuõđteâđ- seeidast). Kuullmõš vueiʹtet riâššâd jiijjad põõrtâst, koʹst-ne jeeʹrab suåppum sââʹjest, leʹbe vueiʹtlvažvuõđi mieʹldd ouddm. åuggan. Komissio reäšš še joukkmaall mieʹldd plaanuum kuullmõõžžid, koin teâđtet jeeʹrab.
Vuäitak tååimted jiijjad kuullmõõžž še ǩeerjlânji. Raʹvvjõs ǩeerjlaž toobdâlm tååimtummša iʹlmmtet mâʹŋŋlubust.
Haaʹleen vuäitak raukkâd pääiʹǩ ool kuullâmpoʹdde leʹbe tõn mâŋŋa Sääʹm psykososiaalʼlaž tuärj juâkkaz Uuvj (neʹttliŋkk tääzz) tuâjjla. Vuäitak õlmmeed tuäivvmõõžž psykososiaalʼlaž tuärj mieʹldd åårrmõõžžâst komissio piisarkådda, leʹbe väʹldded vuõiʹǧǧest õhttvuõđ Uʹvjje 040 663 8882.
Mäʹhtt muu mainstem mušttlõõzz ǩiõttʼtõõlât?
Kuullmõš jiõntet, koon mâŋŋa tõt litterââʹsttet. Kuullmõõžž mâŋŋa tuʹst lij vueiʹtlvažvuõtt lââʹzzted leʹbe muʹtted uʹvddmad teâđaid, leʹbe jårrâʹstted jiijjad miâsttmõõžž komissio ââʹnned uʹvddmad teâđaid.
Tobdlmad puäʹđet ǩiõttʼtõõllâd teâttstaanâld da haaʹleen tuu nõõm ââneeʹl komissio raportâsttmõõžžâst. Komissio analysâstt noorrâm teâđaid da tõi vuâđald še ǩeeʹrjtet lopprapoort, koon jorddmõššân lij puʹhtted õlmmsa säʹmmlai vueiʹnnem vieʹrrvuõđid da vuõiggâdvuõđi neuʹrrummuž riikk da veʹrǧǧniiʹǩǩi tååimain. Komissio eʹtǩǩad tååimaid, koin vueiʹtet pueʹreed säʹmmlai sââʹj Lääʹddjânnmest da cõggâd vieʹrrvuõđi oʹđđest šõddmõš.
Teâttstaan
Raukkâp pâi miâsttmõõžž mušttlõõzzi noorrmõʹšše. Vuäitak jårrâʹstted jiijjad miâsttmõõžž kuullmõõžži poodd kuäʹss täättas vääʹldeeʹl õhttvuõđ piisarkådda. Uʹvddmad teâtt luõvtet teâttstaanâld Meersažarkiiv Sääʹmarkiiʹve. Miâsttmõõžž jårrâsttmõš lij vueiʹtlvaž tõn räjja.
Tuu mainstem mušttlõõzzid ǩiõttʼtõõlât lopprapoortâst anonyymnallšeld. Haaʹleen vuäitak raukkâd, što mainstem mušttlõs peäggtet jiijjad nõõmin.
Lââʹssen teâttsuõjjčiõlǥtõs, koʹst puätt õlmmsa tääʹrǩben mäʹhtt komissio tuârvv uʹvddmad teâđ teâttstaanni ǩiõttʼtõõllmõõžž veeʹzz tän proseeʹss ääiʹj. Taarbšeen vuäitak vuäǯǯad lââʹssteâđaid piisarkååʹddest.
Õhttvuõđteâđ
Ulla Aikio-Puoskari
väʹlddpiisar
ulla.aikio-puoskari(at)sdtsk.fi
050 431 9952
Inari Alanko
plaaneeʹjj
inari.alanko(at)sdtsk.fi
050 478 4450
Aslak Uula Länsman
plaaneeʹjj
aslak.lansman(at)sdtsk.fi
050 479 2204
Mervi Semenoff
plaaneeʹjj
mervi.semenoff(at)sdtsk.fi
050 448 3217
Uvjj lij sääʹm psykososiaal’laž tuärj juâǥǥas. Tõt taʹrjjad sääʹmǩiõllsaž da sääʹmkulttuur meâldlaž vueʹllǥaž kõddâz miõlltiõrvâsvuõttkääzzkõõzzid – vuä´ppõõzzid, tuärj da kriistuâj jiijjâs jieʹnnǩiõʹlle (tâʹvvsääʹm-, aanarsääʹm-, nuõrttsääʹm- leʹbe lääʹddǩiõʹlle). Kääzzkõs lij määusteʹmes. Uvjj lij vuâđđuum tuärjjeed säʹmmlai da Lääʹddjânnam valdia kõskksaž tuõttvuõtt- da suåvâdvuõttkomissiotuâj leša õhttvuõđ vuäitt väʹldded huõlǩani tõʹst, vuässââtt-a tuõttvuõtt-da suåvâdvuõttkomissio kuullmõõžžid.