Sámedikki stivra lea máhcahan duohtavuohta- ja soabadankomišuvnna dili ja joatkkadoaimmaid ođđasit gieđahallamii dievasčoahkkimii, mii dollojuvvo 30.9.2022.
Vuorddidettiin sámedikki mearrádusa duohtavuohta- ja soabadankomišuvnna komissárat ja čállingoddi čoahkkanii Roavvenjárgii 8.-9.9.2022 bargočoahkkimii, gos plánejuvvui doaimma vejolaš joatkaga ja ovdamearka dihtii nuortalaččaid gullamiid, maid nuortalaččaid siidačoahkkin lei sávvan cealkámušastis.
Bargočoahkkima áššelisttus lei maiddái eará sámejoavkkuid gullamiid válmmastallan. Dasa lassin komišuvdna plánii ovttasbarggu sámiid psykososiála doarjaga ovttadagain (Uvjj, Uvjâ, Uvja). Uvjjas lei ovttadaga hoavda Heidi Eriksen báikki alde.
