Sámediggi gulai 23.6.2022 dievasčoahkkimistis duohtavuohta- ja soabadankomišuvnna golmma joatki ja guokte earránan komissára, čállingotti plánejeaddji ja psykososiála doarjaga ovttadaga hoavdda. Gullandilálašvuođa maŋŋá Sámedikki ráđđádalai komišuvnna joatkkagis ja ođđa komissáraid válljemis ja válljenmeannudeamis. Sámedikki stivrra evttohus lei doarjut komišuvnna joatkkaga ja válljet ođđa komissáraid jo 23.6.2022 čoahkkimis. Sámediggi goit mearridii doarjut komišuvnna barggu joatkkaga ja válljet ođđa komissáraid borgemánus ordnejuvvon badjelmearálaš čoahkkimis.
Sámedikki mearrádus oaivvilda dan, ahte meastta guokte mánu eahpesihkkarvuođa maŋŋá komišuvdna beassá joatkit barggu válmmastallama ja plánema, go komišuvnnas lea ain ásaheddjiid doarjja. Duohtavuohta- ja soabadankomišuvnna komissárat ja čállingotti plánejeaddjit válde buriin mielain vuostá dieđu Sámedikki mearrádusas. Sámedikki gullandilálašvuhtii oassálastán plánejeaddji Ásllat Ovllá Länsman lea duđavaš das, ahte eahpesihkarvuohta barggu joatkkaga birra lea nohkan.
– Dál mis lea dieđus juogalágan áigetávval goas komissárat sáhttet dahkat buot mearrádusaid ja linnjemiid bargguin ja doaimmain. Mii sáhttit plánet ja válmmastallat buorre movttain ja motivašuvnnain go mis lea diehtu, ahte komišuvnna dehálaš bargu joatkašuvvá ain dáid dáhpáhusaid ja váttisvuođaid maŋŋel. Mearrádus oaivvilda dan, ahte komišuvdna ferte nannet dábálaš sápmelaččaid luohttámuša komišuvnna bargui rabasvuođain ja áddehahtti diehtojuohkimiin. Dat lea earenoamáš dehálaš dahje muđui gal mandáhta mihttomearit eai leat olámuttus nie, ahte barggus livččii ávki sidjiide geain váras olles proseassa lea ásahuvvon, nappo sámiid, geat leat gillán historjjás ja ain otná beaivve dáhpáhuvvan vuoigatvuođaid loavkidemiin ja olgguštemiin.
– Komissárain, geat leat ain joatkimin luohttámušdoaimmastis, lea nana luohttámuš, ahte barggu organiseremii, ruhtadeapmái ja áigetávvaliidda láktasan hástalusat leat čoavdimis. Ásahanoassebealit leat gieđahallan komišuvnna barggu hástalusaid máŋga vahkku ja ain mearridan doarjut joatkkaga. Moai, geat letne ain bargamin čállingottis, fertejetne joatkit bargamis seamma čatnašumiin plánen-, válmmastallan ja ollašuhttinbargguiguin vai beasašeimmet sámeálbmoga gullamiidda dalán go ođđa komissárat ja ođđa virgeolbmot leat bargagoahtán ja komišuvnna bargguid dilli livččii dohkálaš lasseruhtadeami ja –áiggi ektui. Sihkkariin lea buohkaide juo čielggas, ahte buot mandáhtta mihttomearit eai leat deivemis dála áigetávvaliin, earenoamážit dáid komissáraid ja virgeolbmuid earránemid maŋŋel, suokkardallá plánejeaddji Ásllat Ovllá Länsman.
Komišuvdna sáhttá dahkat aitosaš mearrádusaid barggu ja doaimma ektui easka dan maŋŋá, go ođđa Sámedikki válljen komissárat leaba namuhuvvon bargui ja álggahan luohttámušdoaimmas. Ovdamearkka dihtii mearrádusat ođđa plánejeaddji ja váldočálli rekryterema ektui sáhttá dahkat easkka dalle, go ođđa komissárat leat álggahan ja komišuvnnas leat vihta komissára. Geassit komišuvdna goittotge válmmastallá rekryteremii laktáseaddji áššiid nu, ahte go proseassa vuolgá johtui, dat sáhtášii ollašuvvat badjelmearálaš ádjaneami haga. Dárkkuhussan lea beassat ordnet almmolaš gullamiid dálánaga go rekryteremat leat dahkkojuvvon ja komišuvnnas leat ođđa komissárat.
Komissárat Hannele Pokka, Kari Mäkinen ja Irja Jefremoff doallat luomu suoidnemánus. Čállingoddi lea bargamin maid suoidnemánus.
Lassedieđuid addiba dárbbu áigge čállingotti plánejeaddjit:
Inari Alanko
inari.alanko(at)sdtsk.fi
tel. +358 295 160 245
Aslak Uula Länsman
aslak.lansman(at)sdtsk.fi
tel. +358 295 161 040