Riikksuåvtõs lij õhttsažtuâjast Sääʹmtiiʹǧǧin da Saaʹmi siidsåbbrin piijjâm Säʹmmlai tuõttvuõtt- da suåvâdvuõttkomissio, koon tåimmpââʹjj lij 28.10.2021–31.12.2023. Säʹmmlai tuõttvuõtt- da suåvâdvuõttkomissio täävtõssân lij aiccâd da ärvvtõõllâd säʹmmlai ǩiõččlâʹsttem historiallaš da ânnʼjõž čårstummuž. Tääzz koʹlle jeäʹrbi mieʹldd riikk suddeempolitikk di vuõiggâdvuõđi neuʹrrummuž.
Komissio tuâjjan lij čiõlǥted, mäʹhtt täk vaaikte säʹmmlaid da sij õutstõʹsse ânnʼjõž vueʹjjest. Säʹmmlai tuõttvuõtt- da suåvâdvuõttkomissio lij tuâjstes piijjâmtuʹmmstõõǥǥ meâldlânji jiõččvälddsaž da čõnnsâʹttem.
Säʹmmlai tuõttvuõtt- da suåvâdvuõttkomissio rääjj tuâjstes rapoort, kååʹtt âânn seʹst konkreettlaž tåimmeʹtǩǩõõzzid. Rapoort luõvtet riikksuåvtõʹsse, Sääʹmtegga da Saaʹmi siidsåbbra 31.12.2023 mõõneeʹst. Komissiost lie vitt jeeʹres vueʹsspieʹli eʹtǩǩeem komissaar. Komissio tuâj tuärjjan päʹlǩǩeet piisarkååʹdd. Komissio vaʹlljad jiõccses vueiʹvvpiisar da jeeʹres piisarkååʹdd. Komissio piisarkåʹdd toiʹmmai vaaldâšm peäʹlest riikksuåvtõõzz kanslia õhttvuõđâst da kanslia tuärjjad tuejjeem tääʹzz toiʹmmjummuž riikk täällarvvlõõzzâst miõttum mieʹrrtieʹǧǧ veäkka.
Riikksuåvtõõzz kanslia iʹlmmat ooccâmnalla
säʹmmlai tuõttvuõtt- da suåvâdvuõttkomissio vueiʹvvpiisar
mieʹrräiggsaž veʹrǧǧkõõsk komissio tåimmpââʹj äigga 31.12.2023 räjja. Mieʹrräiggsažvuõđ mäinnan lij tuâj luândd.
Vueiʹvvpiisren reâuggai oummu tuâjaid koʹlle piisarkååʹdd tuâj jååʹđtem da organisâʹsttem komissio ohjjummšest. Son tåimm piisarkååʹdd vaaldšemvuõđlaž ouddooumžen da vaʹsttad jeäʹrbi mieʹldd tällõsplaanmest õõutâst komissioin. Vueiʹvvpiisar vuässââtt tuejjeem tääʹzz komissiotuõjju piisarkååʹddest, koʹst suu lââʹssen reâugga 3-4 oummu. Lââʹssen vueiʹvvpiisar vuässââtt komissio såbbrid piisren.
Pueʹrmõs vaalmâšvuõđ tuâj håiddma oudd õllʼjab õllškooul- leʹbe mii-ne jeeʹres tuâjast spraavdõõttmõõžž tuärjjeei tuʹtǩǩõs. Ooccjest oudldet sääʹmǩiõl šiõǥǥ njäälmlaž da ǩeerjlaž silttõõzz, šiõttuum veʹrǧǧoummin kaiʹbbjum dommjânnmallaš ǩiõli silttõõzz, jeeʹres (jeäʹrben eŋgglõsǩiõll) ǩiõllsilttõõzz di sääʹmkulttuur tobddmõõžž. Säimmõõttâmtäidd, õhttsažtuâjjodd di pâstlvažvuõtt jeärtõõllâd da lõđsted veiddsõs tuʹtǩǩeemaunstõõzz oouʹdee tuâj oʹnnsteeʹjes håiddmõõžž. Tuejjeem tääʹzzest čuäʹjtum jååʹđtemsilttõs lij ouddõssân piisarkååʹdd tuâj ohjjummšest.
Piisarkååʹdd tåimmpäiʹǩǩ puätt leeʹd säʹmmlai dommvuuʹdest, mõõn oocci âlgg väʹldded lokku. Tääʹrǩab sâjjdâʹttempäiʹǩǩ-kåʹdd seʹlvvan mâʹŋŋlest. Tuâjj ooudald âʹlddåårrmõõžž tåimmpääiʹǩest da vueʹzzin maatkčummuž tuâjai kaiʹbbjem veiddsõsvuõđâst. Tuâjast lij ougglest reâuggamvueiʹttemvuõtt.
Päʹlǩǩõs lij riikk päʹlǩǩeemnaaʹli meâldlaž. Oocci vuäitt eʹtǩǩeed jiijjâs päʹlǩǩtuäivvmõõžž ooccmõõžžâst.
Oummust, koon vaʹlljeet vergga leʹbe tuõjju, vueiʹtet tuejjeed oocci miâsttmõõžžin ooumažstaanvuõttčiõlǥtõõzz (staanvuõttčiõlǥtõslääʹǩǩ 726/2014).
Staanvuõttčiõlǥtõsmõõntõõllmõõžžâst da čiõlǥtõõzz vuâllsaž oummu vuõiggâdvuõđin käunnʼje tääʹrǩab teâđ addrõõzzâst www.supo.fi.
Veʹrǧǧkõõskâst vueiʹtet ââʹnned jäänmõsân kuuđ määnpââʹj teʹsttääiʹj.
Lââʹssteâđaid tuâjast ouʹdde komissaar Hannele Pokka puh. 040 4822 772 di plaaneei Inari Alanko teʹl. 0295 160 245.
Tuâj ooccâmäiʹǧǧ älgg 7.10.2022. Riikksuåvtõõzz kansliaaʹje čuäʹjtum ooccmõõžžid raaukât tååimted mââimõõzzâst 22.10.2022 čiâss 16.15 mõõneeʹst ââʹneeʹl vuõss-sâjjsânji liâđǥlaž lomaakk addrõõzzâst www.valtiolle.fi (ID 23-74-2022 ohjjad vuõiʹǧǧest iʹlmmtõʹsse). Mâŋŋnam ooccmõõžžid jeät valddu lokku. Ooccmõõžž vuäitt tååimted še riikksuåvtõõzz kanslia rekisterâʹsttemkonttra pååʹštaddrõõzzin PL 23, 00023 Riikksuåvtõs leʹbe jååʹttemaddrõõzzin Ritarikatu 2 B, Heʹlssen leʹbe neʹttpååʹštin kirjaamo@vnk.fi.