Uccjooǥǥ Karigasnjaarǥ ååraš Mira Pohjanrinne lij alttääm komissio saaǥǥtemplaaneeʹjen. Pohjanrinne lij meeraikõskksaž da verddõõlli vuõiggâdvuõtt-tiõtti maister Heʹlssen universiteeʹttest da suʹst lij ääiʹjab harjjnummuš õhttõsǩeeʹddest, ålggaaʹššivaaldšummšest da jeeʹresnallšem saaǥǥtemtuâjain še.
Pohjanrinne lij reâuggam jm. Pelastakaa Lapset ry:st, Climate Leadership Coalition -äimmõs-täällsäimmõõzzâst di Lääʹddjânnam põõšši eeʹttkâsttõõzzâst Õhttõõvvâm meerkooʹddin. Komissio õõʹni äärvast vaʹlljummšeʹstes Pohjanrinne harjjnummuž saaǥǥtummuž lââʹssen še ooumažvuõiggâdvuõttkõõččmõõžžid. Tuâjj Nuorten Akatemia da Sääʹmteeʹǧǧ nuõrisuåvtõõzz Dihtosis-projeeʹktest peäʹlstes oouʹdii päärnai da nuõri tieʹttemvuõđ säʹmmlain, mii puätt ââlda komissio tuâj sääʹmteâđ lââʹzztem diõtt õhttsažkååʹddest.
Pohjanrinne mušttal, što suu miõl mieʹldd ääʹšš kueʹsǩǩe rääuhkõõččmõõžžid.
– Tõt, što piâzzam oouʹdeed tän jiijjan meer tuõttvuõđ da suåvâdvuõđ proseeʹss di piâzzam puʹhtted tõn kuâsttjeeʹjen še väʹlddnarood kõskkvuõđâst, päʹlǩǩad muu, son ceälkk.
Pohjanrinne puätt piisarkååʹdd vuäzzliʹžžen kriittlaž poodd tõn diõtt, ko komissio plaanad õlmstâʹtted lopprapoortâs eeʹjj looppâst. Ouddâl tõn âlgg tuejjeed kõrrset tuâj âlddsin 400 kuullmõõžžâst da komissiooʹje valmštõllum pååđčiõlǥtõõzzin vuåǯǯum jõnn teâttmeäʹr siʹllʼjem diõtt obbvuõttân, koon fiʹttjet. Saaǥǥtummuž rool da miârktõs šâʹdde šuurben komissio mââimõs reâuggameeʹjj ääiʹj.
– Komissio lij tuâjstes jiõččnaž da čõnnsâʹttem nuʹtt, što tõt lij tän räjja håiddam še saaǥǥtemtuâjees jiõččnânji, särnn komissio vueiʹvvpiisar Ulla Aikio-Puoskari. – Riikksuåvtõõzz saaǥǥtemjuâǥǥas puätt kuuitâǥ mieʹldd komissio tuâj loopp-peäʹlnn, kuäʹss tuâjj poott. Luõvtep teʹl tuâj puäđõõzzid leʹbe lopprapoort eʹtǩǩõõzzeesvuiʹm komissio piijjʼjid, leʹbe väʹlddministeera, Sääʹmtegga da Saaʹmi siidsåbbra.
Riikksuåvtõõzz kanslia iʹlmmti saaǥǥtemplaaneei mieʹrräiggsaž tuâj ooccâmnalla 18.12.2024. Ooccâmääiʹj puuttmõõžž 10.1.2025 mõõneeʹst tuõjju kuõʹđđeš õhttsiʹžže 13 ooccmõššâd. Komissio kååččai mainstâʹttemnalla nellj oocci, koin tuõjju vaʹlljeeš Mira Pohjanrinne.
Lââʹssteâđ:
Vueiʹvvpiisar Ulla Aikio-Puoskari, ulla.aikio-puoskari@gov.fi, teʹl. 050 431 9952
Saaǥǥtemplaaneei Mira Pohjanrinne, mira.pohjanrinne@gov.fi, 029 516 9941