Pueʹtted tiõrvân säʹmmlai tuõttvuõtt- da suåvâdvuõttkomissio Oulu vuuʹd sääʹmnuõrid järjstum noorõõttmõʹšše! Noorõõttmõš riâžžât 22.4. Joo-kaaʹffpõõrtâst (Satamatie 5) čiâss 15-18. Noorõõttmõõžžâst taʹrjjeet kååʹff, viʹlǧǧesleeiʹb da vuäitak väʹldded mieʹldd håʹt mâka kõõskraajjâmǩiõtt-tuâi meâldad jõs haaʹlääk.
Noorõõttmõõžž mieʹrren lij tobdstõõttâd komissio tuõjju da piâssâd õõutâst saǥǥstõõllâd sääʹmnuõrid vääžnai aaʹššin. Noorõõttmõõžžâst vuäitak še vaʹrrjed ääiʹj kuullâmpoʹdde, jõs haaʹlääk. Komissio haaʹlad kuullâd sääʹmnuori jiõn da toobdâlmid tõʹst, što måkam lij leeʹd sääʹmnuõrr Lääʹddjânnmest. Noorõõttmõʹšše vuässââtt še tuâjjlaž Lahja Eriksen Sääʹm psykososiaal’laž tuärj juâkksest.
Komissio ooudâst pääiʹǩ âʹlnn lie komissaar Anni-Siiri Länsman da plaaneei Inari Alanko. Lââʹsskõõččmõõžžid vuäitt kõõččâd Inari Alankost inari.alanko@sdtsk.fi leʹbe nââmrest 050 478 4450. Noorõõttmõʹšše ij taarbaš jeeʹrab iʹlmmtõõttâd. Pueʹtted tiõrvân!