1800-logu álgogeaži rájes máŋggat Beahcáma guovllus johtán virgeolbmot, dutkit, girječállit ja doaimmaheaddjit leat gilván negatiivvalaš doaladumiid guovllu sámeálbmoga guovdu ja futnon sin eallinvugiid ja eallinárvvuid. Dutkit čálle jávki álbmotoasis, gielas ja kultuvrras. Beahcáma eamiveahkadaga iešárvvudovdu seaillui goittotge máŋggaid váttes eallinmuttuid čađa, ruovttuguovllu massimis ođđa eallima huksemii.
Sámiid duohtavuohta- ja soabadankomišuvdna almmustahttá gaskavahku 20.8. ođđa sierračielggadeami”Nuortasámi kulturárbi lokte iešárvvudovddu”. Dan lea čállán duohtavuohta- ja soabadankomišuvnna komissára Irja Jefremoff.
Sierračielggadeapmi dárkkoda golmma nuortalaš siidda, Báhčaveaijoga, Beahcáma ja Suonnjela, ja daid ássiid eallingalgamušaid basku eallinbirrasiinniset 1920- ja 1930-loguid Beahcámis. Nuortalaččat gárte vásihit sihke Suoma dálvesoađi ja nuppi máilmmisoađi áigge losses eallinmuttuid ja loahppadáhpáhusain stuorra massimiid.
– Čuovun dán golmma nuortalaš siidda ássiid ja sin maŋisbohttiid muttuid maiddái, go sii ledje evakuerenmátkkis Davvibađaeatnamis, máhcce davás, ohce duskkalaččat ođđa ruovttuguovllu ja vuogáiduvvagohte nuppástuvvan diliide, Jefremoff muitala. – Lean háliidan čielggadeamistan addit jiena Báhčaveaijoga, Beahcáma ja Suonnjela siiddaid ássiide iešguđet áigodagaid jearahallamiid bokte. Sávan ahte mu bargu illudahtášii ja ávkkuhivččii maŋisbohttiid, earenoamážit nuoraid, geat mielastan čájehit lassáneaddji beroštumi ja árvvusatnima máttarvánhemiiddiset nuortasámi árbevieru guovdu.
Čielggadeapmi almmustahttojuvvo Stáhtaráđi neahttasiidduin 20.8. dii 8:
- Irja Jefremoff: Itäsaamelainen kulttuuriperintö nostaa omanarvontuntoa. https://urn.fi/URN:ISBN:978-952-383-320-3
Čielggadeapmi lea oassi Sámiid duohtavuohta- ja soabadankomišuvnna sierračielggademiid ráiddus. Komišuvnna bargu lea čielggadit sámiid vásihan vealaheami ja assimilašuvnna ja ovdanbuktit vugiid hukset soabadeami eamiálbmot sápmelaččaid ja Suoma stáhta gaskkas. Dieđut komišuvdnii ráhkaduvvon čielggademiin gávdnojit neahttasiidduin https://sdtsk.fi/julkaisut/.
Lassedieđut
Komissára Irja Jefremoff
irja.jefremoff(at)sdtsk.fi
Váldočálli Ulla Aikio-Puoskari
ulla.aikio-puoskari(at)sdtsk.fi
Gulahallanplánejeaddji Mira Pohjanrinne
mira.pohjanrinne(at)sdtsk.fi