Mira Pohjanrinne lea álggahan komišuvnna gulahallanplánejeaddjin. Son lea eret Ohcejoga Gáregasnjárggas. Pohjanrinne lea studeren Helssega universitehtas riikkaidgaskasaš ja veardádalli riektediehtagiid magisttarin ja sus lea ovdalis hárjánupmi organisašuvdnasuorggis, olgoáššiidhálddahusas ja maiddái iešguđetlágan gulahallanbargguin.
Pohjanrinne lea bargan ee. Pelastakaa Lapset -organisašuvnnas (Gáddjot mánáid), dálkkádat-fitnodatfierpmádat Climate Leadership Coalitionis, ja Suoma bissovaš ovddastagas ON:in. Komišuvdna anii válljejumistis árvvus dan, ahte Pohjanrinne lea oahppašuvvan gulahallama lassin maiddái olmmošvuoigatvuođagažaldagaide. Bargu Nuoraid Akademiija ja Sámedikki nuoraidráđi Dihtosis-prošeavttas fas ovddidii sámediđolašvuođa mánáid ja nuoraid olis. Dát fáddá lea lahka komišuvnna barggu lasihit servodagas dieđuid sámiid birra.
Pohjanrinne muitala, ahte son ieš lea hui beroštuvvan ráfigažaldagain.
– Lea somá beassat ovddidit iežas álbmoga duohtavuođa ja soabadeami proseassa, ja buktit dan oinnolažžan maiddái váldoálbmoga siste, son dadjá.
Pohjanrinne searvá čállingotti jovkui kritihkalaš bottus, daningo komišuvdna berre almmustahttit loahpparaporttas jagi loahpas. Dan ovdal ferte rahčat lagabui 400 gullama olis ja sillet komišuvdnii ráhkaduvvon sierračielggademiid viiddes diehtomeari ipmirdahtti ollisvuohtan. Gulahallama rolla ja mearkkašupmi lassána komišuvnna maŋimuš bargojagis.
– Komišuvdna lea barggustis iehčanas ja sorjjasmeahttun, nappo dat lea dán rádjái dikšon maid gulahallanbarggus iešheanalis, dadjá komišuvnna váldočálli Ulla Aikio-Puoskari. – Stáhtaráđi gulahallanossodat boahtá goittotge mielde komišuvnna barggu loahppamuttus, ja dalle bargu gárvána. Mii geiget dalle barggu bohtosiid dahjege loahpparaportta oktan evttohusaiguin komišuvnna ásaheddjiide, nappo váldočállái, sámediggái ja nuortalaččaid siidačoahkkimii.
Stáhtaráđi kansliija almmuhii gulahallanplánejeaddji mearreáigásaš doaimma ohcan ládje 18.12.2024. Ohcanáiggi siste, 10.1.2025 rádjái, doibmii bohte oktiibuot 13 ohcamuša. Komišuvdna bovdii jearahallamii njeallje ohcci, geaid siste bargui válljejuvvui Mira Pohjanrinne.
Lassidieđut:
Váldočálli Ulla Aikio-Puoskari, ulla.aikio-puoskari@gov.fi, 050 431 9952
Gulahallanplánejeaddji Mira Pohjanrinne, mira.pohjanrinne@gov.fi, 029 516 9941