Statârääđi lii ohtsâšpargoost Sämitiggijn já Nuorttâlij sijdâčuákkimáin asâttâm Sämmilij tuotâvuotâ- já sovâdâttâmkomissio, mon toimâpaje lii 28.10.2021-31.12.2023. Sämmilij tuotâvuotâ- já sovâdâttâmkomissio mittomeerrin lii tubdâđ já árvuštâllâđ sämmilij feerim historjálii já tááláá olgoštem. Taas kuleh eereeb iärrás staatâ suddâdempolitiik sehe vuoigâdvuođâi luávkkámeh.
Komissio pargon lii čielgâdiđ, maht taah vaigutteh sämmiláid já sii siärvusân tááláá tiileest. Sämmilij tuotâvuotâ- já sovâdâttâmkomissio lii pargostis asâttemmiärádâs mield jiečânâs já sorjomettum.
Sämmilij tuotâvuotâ- já sovâdâttâmkomissio ráhtá pargostis raapoort, mii siskeeld konkreetlijd toimâiävtuttâsâid. Raapoort luovâttuvvoo staatârááđán, sämitiigán já nuorttâlij kyláčuákkimân majemustáá 31.12.2023. Komissiost láá vittâ sierâ uásipeelij iävtuttem komissaar. Komissio pargo toorjân pálkkááttuvvoo čäällimkodde. Komissio väljee olssis uáivičällee já eres čäällimkode jesânijd. Komissio čäällimkodde tuáimá haldâttâhlávt statârääđi kanslia ohtâvuođâst já kanslia tuárju keevâtlii toimâm staatâ budjetist mieđettum meriruuđáin.
Statârääđi kanslia julgáášt ávusin
Sämmilij tuotâvuotâ- já sovâdâttâmkomissio uáivičällee
meriáigásii virgekoskâvuođâ komissio toimâpaje ááigán 31.12.2023 räi. Meriáigásâšvuođâ suijân lii pargo luándu.
Uáivičällen pargee ulmuu pargoid kulá čäällimkode pargo jođettem já ornim komissio stivrimist. Sun tuáimá čäällimkode haldâttâhlâš ovdâolmožin já västid eereeb iärrás ekonomâlii vuávámist oovtâst komissioin. Uáivičällee uásálist keevâtlii komissiopaargon čäällimkoddeest, mast pargeh suu lasseen 3-4 ulmuu. Lasseen uáivičällee uásálist komissio čuákkimáid čällen.
Pargo tipšomân pyeremuid iävtuid addel aaleeb ollâškovlâ- tâi miinii eres pargoost piergim tuárjoo tođhos. Occest váttoo sämikielâ pyeri njálmálâš já kirjálâš táiđu, asâttum virgeulmuin vattum päikkieennâmlij kielâi táiđu, eres (erom. eŋgâlâškielâ) kielâtáiđu sehe sämikulttuur tubdâmuš. Viärmádumetáiđu, ohtsâšpargonaavcah sehe máttu silliđ já sierriistâllâđ vijđessuárgásii tutkâmušamnâstuv ovdedeh pargo miänástum tipšom. Keevâtlávt čaittum jođettemtáiđu lii hiättun čäällimkode pargo stivrimist.
Čäällimkode toimâsaje šadda leđe sämmilij päikkikuávlust, mon occee kannat väldiđ huámášumán. Täärhib soijimpäikkikodde čiälgá majeláá. Pargo váátá mieldiorroom toimâpääihist já uásild mađhâšem pargoi vaattâm vijđesvuođâst. Pargoost lii káiduspargomáhđulâšvuotâ.
Pälkkitääsi lii staatâ pálkkááttemvuáválâšvuođâi miäldásâš. Occee puáhtá adeliđ jieijâs pälkkituoivuu ucâmušâst.
Viirgán tâi paargon valjimnáál ulmust puáhtá toohâđ occee mietâmáin persovntorvolâšvuotâčielgâdem (Torvolâšvuotâčielgâdemlaahâ 726/2014).
Torvolâšvuotâčielgâdemmonâttâlmist já čielgâdem čuosâttuv vuoigâdvuođâin kávnojeh täärhib tiäđuh čujottâsâst www.supo.fi.
Virgekoskâvuođâst puáhtá anneeđ enâmustáá kuttâ mánuppaje keččâlemääigi.
Lasetiäđuid pargoost adelává komissaar Hannele Pokka puh. . 040 4822 772 sehe vuávájeijee Inari Alanko puh. 0295 160 245.
Pargo uuccâmäigi álgá 7.10.2022. Statârääđi kanslian čujottum ucâmušâid pivdep toimâttiđ majemustáá 22.10.2022 tme 16.15 vuosâsaajeest šleđgâlii luámáttuvváin čujottâsâst www.valtiolle.fi (ID 23-74-2022 stivree njuolgist almottâsân). Maŋŋeed puáttám ucâmušah iä valduu huámášumán. Ucâmuš puáhtá toimâttiđ meiddei statârääđi kanslia kirjimkontturân postâčujottâssáin PL 23, 00023 Valtioneuvosto tâi kollimčujottâssáin Ritarikatu 2 B, Helsig tâi šleđgâpostáin kirjaamo@vnk.fi.