Mira Pohjanrinne, kote lii vuálgus Ucjuuvâ Kärigâsnjaargâst, lii algâttâm komissio viestâdemvuávájeijen. Pohjanrinne lii aalmugijkoskâsii já viärdádâllee riehtitiettuu maister Helsig ollâopâttuvâst, já sust lii hárjánem ornijdumekiedist, olgoašijhaldâttuvâst já meiddei jieškote-uvlágánijn viestâdempargoin.
Pohjanrinne lii porgâm el. Pelastakaa Lapset:ist, šoŋŋâdâh-businessviärmádâh Climate Leadership Coalitionist já Suomâ fastâ ovdâstâsâst OA:st. Komissio oonij valjimstis áárvust Pohjanrinne hárjánem viestâdem lasseen meiddei olmoošvuoigâdvuotâkoččâmušâin. Pargo Nuorâi Akatemia já Sämitige nuorâirääđi Dihtosis-projektist vist levâttij sämitiäđuid párnáid já nuoráid. Taat lii siämmáálágán pargo ko komissio pargo, mii lii lasettiđ sämitiäđuid ohtsâškoddeest.
Pohjanrinne muštâl, et sun lii perustum eromâšávt ráávhukoččâmušâin.
– Tot lii munjin stuorrâ kunnee, et peesâm ovdediđ jieččân aalmug tuotâvuođâ já sovâdâttâm proosees já pyehtiđ tom uáinusân meiddei väldiaalmugân, sun iätá.
Pohjanrinne siärvá čäällimkoodán já naanood tom kriittisii muddoost, tastko komissio ulmen lii almostittiđ loppâraapoort ive loopâst. Ovdil tom kalga porgâđ korrâsávt, vâi puoh tiäđuin, moh láá nurrum masa 400 kulâmist já komission valmâštâllum sierânâsčielgiittâsâin, šodâččij iberdettee ubâlâšvuotâ. Viestâdem roolâ já merhâšume tiäduttuvvojeh komissio majemuu pargoive.
– Komissio lii pargostis jiečânâs já jiešmerideijee, nuuvt et tot lii taan räi hoittám meiddei viestâdempargoidis jiečânávt, iätá komissio uáivičällee Ulla Aikio-Puoskari. – Staatârääđi viestâdemuásádâh puátá kuittâg fáárun komissio pargo loppâmuddoost, kuás ubâlâšvuotâ šadda valmâšin. Talle mij luovâttep pargo puátusijd ađai loppâraapoort já oovdânpyehtimijd komissio asâtteijeid ađai uáiviministerân, Sämitiigán já nuorttâlij sijdâčuákkimân.
Staatârääđi kanslia almottij uuccâmnáál viestâdemvuávájeijee meriáigásii virge 18.12.2024. Uuccâmäigi nuuvâi 10.1.2025, já ucâmušah pottii ton räi ohtsis 13. Komissio povdij nelji occee pargosahhiittâlmân, já sist viirgán väljejui Mira Pohjanrinne.
Lasetiäđuh:
Uáivičällee Ulla Aikio-Puoskari, ulla.aikio-puoskari@gov.fi, 050 431 9952
Viestâdemvuávájeijee Mira Pohjanrinne, mira.pohjanrinne@gov.fi, 029 516 9941