Staatârääđi lii ohtsâšpargoost Sämitiggijn já Nuorttâlij sijdâčuákkimáin asâttâm Sämmilij tuotâvuotâ- já sovâdâttâmkomissio, mon toimâpaje lii 28.10.2021-31.12.2023. Sämmilij tuotâvuotâ- já sovâdâttâmkomissio mittomeerrin lii tubdâđ já árvuštâllâđ sämmilij feerim historjálii já tááláá olgoštem. Taas kuleh eereeb iärrás staatâ suddâluttempolitiik sehe vuoigâdvuođâi luávkkámeh.
Komissio pargon lii čielgâdiđ, ete maht taah vaigutteh sämmiláid já sii siärvusân tááláá tiileest. Sämmilij tuotâvuotâ- já sovâdâttâmkomissio lii pargostis asâttemmiärádâs mield jiečânâs já sorjomettum.
Sämmilij tuotâvuotâ- já sovâdâttâmkomissio ráhtá pargostis raapoort, mii siskeeld konkreetlijd toimâiävtuttâsâid. Raapoort luovâttuvvoo staatârááđán, Sämitiigán já Nuorttâlij sijdâčuákkimân majemustáá 31.12.2023. Komissiost láá vittâ sierâ uásipeelij iävtuttem komissaar. Komissio pargo toorjân pálkkááttuvvoo čäällimkodde. Komissio väljee olssis uáivičällee já eres čäällimkode jesânijd. Komissio čäällimkodde tuáimá haldâttâhlávt staatârääđi kanslia ohtâvuođâst já kanslia tuárju keevâtlii toimâm staatâ budjetist mieđettum meriruuđáin.
Staatârääđi kanslia julgáášt ávusin
sämmilij tuotâvuotâ- já sovâdâttâmkomissio čäällimkode vuávájeijee
meriáigásii virgekoskâvuođâ komissio toimâpaje ááigán 31.12.2023 räi. Meriáigásâšvuođâ suijân lii pargo luándu.
Vuávájeijen pargee ulmuu pargoid kuleh čäällimkode almoliih haaldâtliih pargoh, tego ekonomia- já mätkihaldâttâh, sehe olášuttem koordinistem uáivičällee toorjân.
Taas kuleh ei. kuullâmtilálâšvuođâi vuáváámân já keevâtlii ornimáid sehe maađhij orniimân lohtâseijee pargoh. Vuávájeijee västid viestâdem vuáváámist komissio siste já olgoskulij. Pargoid kulá viestâdem sierâ kanavijn já ohtsâšpargojuávhuin. Toos lasseen pargo luávdá nettisiijđoi já šleđgâlij pargotiilij paijeentoollâm. Vuávájeijee puáhtá toimâđ komissio eres tooimân lohtâseijee pargoin tienuuvt, ko sierâ suápih. Vuávájeijei siskáldâs pargojuávust já tiäddutmijn puáhtá tärhibeht sooppâđ, ko toimâ álgá.
Occein váttoo sämikielâ pyeri njálmálâš já kirjálâš táiđu. Occei annoo hiättun tulkkumtáiđu sämikielâst / sämikielân sehe šiev sämikulttuur tubdâm. Occest váttoo asâttum virgeulmuin vattum päikkieennâmlij kielâi táiđu, eres (erom. eŋgâlâškielâ, tárukielâ) kielâtáiđu. Vuávájeijest kalga leđe táiđu pyevtittiđ sierrejum teevstâ, raportijd já čuákánkiäsuid. Toos lasseen pyereh vuáruvaikuttâstááiđuh, ohtsâšpargonaavcah sehe hárjánem viestâdem já almoshaldâttuv pargoin ovdedeh pargo miänástum hoittám. Pargoi hoittám tuárju hiäivulâš áámmátlâš tođhos tâi škovlim.
Čäällimkode toimâpäikki šadda leđe sämmilij päikkikuávlust, mon occee kalga väldiđ huámmášumán. Täärhib soijimpäikkikodde čiälgá majeláá. Pargo váátá mieldiorroom toimâpääihist já uásild mađhâšem pargoi vaattâm vijđesvuođâst. Pargoost lii káiduspargomáhđulâšvuotâ.
Pälkki lii euroin já tot lii mättim já tärhibeht meridum pargoi mield suulân 3000-3500 euro kooskâst.
Viirgán tâi paargon valjimnáál ulmust puáhtá toohâđ occee mietâmáin persovntorvolâšvuotâčielgâdem (Torvolâšvuotâčielgâdemlaahâ 726/2014). Torvolâšvuotâčielgâdemmonâttâlmist já čielgâdem čuosâttuv vuoigâdvuođâin kávnojeh täärhib tiäđuh čujottâsâst www.supo.fi.
Virgekoskâvuođâst puáhtá anneeđ enâmustáá kuttâ mánuppaje keččâlemääigi.
Lasetiäđuid pargoost adelává komissio saavâjođetteijee Hannele Pokka puh. 040 4822 772 sehe vuávájeijee Inari Alanko puh. 0295 160 245.
Tooimâi uuccâmäigi álgá 8.11.2022. Staatârääđi kanslian čujottum ucâmušâid táttup toimâttiđ majemustáá 17.11.2022 tme 16.15 räi vuosâsaajeest šleđgâlii luámáttuvváin čujottâsâst www.valtiolle.fi (ID 23-73-2022 stivree njuolgist almottâsân). Maŋadist puáttám ucâmušah iä valduu huámmášumán. Ucâmuš puáhtá toimâttiđ meid staatârääđi kanslia kirjimkontturân postâčujottâssáin PL 23, 00023 Valtioneuvosto tâi kollimčujottâssáin Ritarikatu 2 B, Helsinki tâi šleđgâpostáin kirjaamo@vnk.fi.