Sämmilij tuotâvuotâ- já sovâdâttâmkomissio uásálist taan ive Skammâkoveh -algâaalmugij elleekovefestivaalân Anarist puáttee oholoopâ 26.-28.1. Komissio lii mieldi orniimin vástuppeeivi 27.1. Sápmi II -uási maŋa tuotâvuotâ- já sovâdâttâmprosesáid lohtâseijee paaneelsavâstâllâm, mon váldusárnon lii Donald (Del) Laverdure. Komissio čälleeh oovdânpyehtih jieijâs tooimâ Saijoos aulast tuorâstuv lekkâmij rääjist kidâ lávurdâheehid räi.
Laverdure tooimâi išesisministerin Ovtâstum staatâi president Barack Obama haldâttuvâst jâ lâi haldâttuv alemuu sajattuvâst orroom algâaalmug ovdâsteijee. Laverdure lii tastoo škovliittum terapeutin já tuáimá meid pyeredeijen Crow -aalmug juávhust.
Skammâkoveh -elleekovefestivaal vuosâehidist mij uáinip aanaarlii Ritva Torikka elleekuuvijd, main ”Out of Darkness into Light” kieđâvuš paldluvâi alaskalij já sämmilij tuotâvuotâ- já sovâdâttâmprosesijd. Sápmi I uási uárnejuvvoo Siidast tme 15 já ton ooleest paaneelsavâstâllâm Saijoos parlamentsali Soljust tme 16.30 rääjist.
Paaneel váldusárnon lii Donald (Del) Laverdure. Sämmilij tuotâvuotâ- já sovâdâttâmkomissiost paaneelsavâstâlmân uásálisteh komissaareh Irja Jefremoff já Heikki Paltto sehe uáivičällee Ulla Aikio-Puoskari. Toos lasseen savâstâlmân uásálistev komissio valmâštâllâmmuddoost kuávdášlávt mieldi orroom Tiina Sanila-Aikio já sämmilij psykososiaallii torjuu ohtâduv pargee Lahja Eriksen.
Paaneelsavâstâllâm uárnejuvvoo oovtâstpargoost Antti Pentikäisijn, kote tooimâi ovdil Säämi tuotâvuotâ- já sovâdâttâmkomissio algâttem toorjân sorjomettum raavâadeleijen. Pentikäinen joođeet tääl Ovtâstum staatâin kuávdáá, mii vuáju tuotâvuotâ- já sovâdâttâmprosesij oovdedmân.
Komissaareh já komissio pargeeh uásálisteh meid eres elleekovečáittusáid. Komissiost lii pääihi alne Sajosist oovdânpyehtimsaje, mast finnee tiäđu komissio pargoin já puáttee tooimâst. Tiervâpuáttim savâstâllâđ!
Lasetiäđuh:
Ulla Aikio-Puoskari, +358 50 431 9952
Inari Alanko, +358 50 478 4450
Aslak Uula Länsman, +358 50 479 2204
Mervi Semenoff, +358 50 448 3217